Дзень роднай мовы

Магчыма, гэта і не нова,

Што слова – зерне на сяўбе,

А хто не любіць роднай мовы,

Той любіць толькі сам сябе…

                         С. Грахоўскі

Мова жывая, пакуль на ёй гавораць. Дзень роднай мовы асаблівы для кожнай нацыі, кожнага народа, бо няма народа без мовы, няма мовы без яго носьбіта.

Дзень роднай мовы — нагода яшчэ раз задумацца пра лёс і будучыню той, якую мы завём нацыянальнай і матчынай.

21 лютага навучэнцы і выкладчыкі   Ваўкавыскага аграрнага каледжа далучыліся да міжнароднага свята.

Цікавая інфармацыя аб развіцці беларускай мовы была змешчана на тэматычным стэндзе. Навучэнцы групы У-11 свае выказванні аб ролі роднай мовы ў сваім жыцці, адносінах да яе, самыя цёплыя словы пашаны да беларускай мовы аформілі ў выглядзе кветкі-прызнання ”Люблю цябе, родная мова!” 

Падчас выхаваўчай гадзіны першакурснікі сабраліся ў чытальнай зале бібліятэкі на літаратурную вечарыну “Я нарадзіўся ў Беларусі, таму, як маці, гавару!”. 

Прысутныя з асалодай слухалі вершы класікаў і сучасных паэтаў, песні  на беларускай мове, глядзелі цікавыя відэаматэрыялы, прысвечаныя мінуламу і сучаснаму развіццю мовы. Выкладчыца беларускай мовы і літаратуры Жардзецкая Б.І. прачытала ўласны верш “Неацэнны скарб любімай Беларусі”. У канцы мерапрыемства прысутныя навучэнцы і выкладчыкі (Ленец А.Л., Буйко А.У., Кандрацкая Г.А., Жардзеці А.Ю.) абмяняліся меркаваннямі наконт сучаснага стану нашай мовы.